Ocean Colour Scene, Dorian, Carlos Sadness, Sanguijuelas do Guadiana e Sés foron anunciados como cabezas de cartel dos Concertos da 63.ª edición Marisco 2026, no Grove.

Tal e como trasladou a organización do evento en nota de prensa, do 1 ao 11 de outubro poderase gozar desta programación gratuíta, encabezado pola banda británica Ocean Colour Scene, xunto con nomes como Dorian, Carlos Sadness, Sés, Sanguijuelas do Guadiana ou 9Louro.

En total, 16 propostas musicais pasarán polo escenario ao longo de once xornadas, nun cartel que volve apostar pola diversidade de estilos e xeracións. A nova edición chega, ademais, após o éxito histórico alcanzado en 2025, cando preto de 40.000 persoas pasaron ao longo do ciclo pola carpa dos concertos.

A música empezará o xoves 1 de outubro coa formación local Vos Firrás, mentres que o venres 2 será a quenda de 9Louro e de Djow.

O sábado 3 de outubro actuará a banda de pop e rock británico Ocean Colour Scene, nunha noite que completará Nanein DJ. De seguido, o domingo 4 o protagonismo será para a música galega con Sés, acompañada pola formación meca 5 en Zocas.

Durante os seguintes días continuarán as actuacións de artistas e grupos vinculados ao Grove: @ de Viño, o luns 5; David Raparigo e Lote, o martes 6; A Banda do Sequío, o mércores 7; e Kballito, o xoves 8.

Xa na recta final dos Concertos do Marisco: o venres 9 actuarán Fla-Meco e Sanguijuelas do Guadiana; e o sábado 10 será a quenda de Carlos Sadness, acompañado por Manu TF DJ, mentres que Dorian porá o broche final á programación o domingo 11 de outubro, nunha última noite na que tamén actuará Freshkinhos.