A Axencia Española de Seguridade Alimentaria e Nutrición (AESAN), adscrita ao Ministerio de Dereitos Sociais, Consumo e Axenda 2030, pediu a retirada de varios lotes dos produtos ‘Tinto de verán limón’, ‘Tinto de verán limón 0,0’ e ‘Tinto de verán gasosa’ da marca La Casera pola posible presenza de fragmentos de vidro. En caso de ter estes produtos afectados en casa, a AESAN pide non consumilos.

No ‘Tinto de verán con limón’, os lotes afectados son os seguintes: 1041024197, con data de caducidade do 15/07/2025; 1041024198, con data de caducidade do 16/07/2025; 1041024199, con data de caducidade do 17/07/2025; 1041024200, con data de caducidade do 18/07/2025; 1041124222, con data de caducidade do 09/08/2025; 1041124223, con data de caducidade do 10/08/2025; e 1041024239, con data de caducidade do 26/08/2025.

Os lotes afectados do ‘Tinto de verán limón 0,0’ son: 1041024200, con caducidade o 18/07/2025, e o 1041224201, con caducidade o 19/07/2025. Por último, os lotes afectados do ‘Tinto de verán gasosa’ son: 1041224201 (con data de caducidade do 19/07/2025) e 1041324221 (con data de caducidade o 08/08/2025).

A propia empresa comunicou a incidencia ás autoridades competentes, en cumprimento da lexislación e a fin de non pór a disposición da poboación alimentos non seguros. A AESAN foi informada a través o Sistema Coordinado de Intercambio Rápido de Información (SCIRI).

Segundo a información dispoñible, a distribución inicial foi ás comunidades autónomas de Andalucía, Asturias, Aragón, Illas Baleares, Cantabria, Cataluña, Castela-A Mancha, Castela e León, Illas Canarias, Estremadura, Galicia, Madrid, Murcia, País Vasco e Comunidade Valenciana, aínda que non é descartable que poidan existir redistribucións a outras comunidades autónomas.

Esta información foi trasladada ás autoridades competentes das comunidades autónomas a través do SCIRI, co obxecto de que se verifique a retirada dos produtos afectados das canles de comercialización.