O Ministerio de Sanidad prosegue co proceso de «análise e estudo» das propostas de varias comunidades como Galicia para comunicar, previsiblemente este venres, as que avanzan de fase na desescalada.
Así o manifestaron a Europa Press fontes deste Ministerio, que indicaron que ministro de Sanidad, Salvador Illa, presidiu este mércores «unha nova rolda de reunións bilaterais entre Goberno e comunidades autónomas para avanzar no Plan de transición cara a unha nova normalidade».
Neste caso, ratificou que Galicia, Cantabria, País Vasco, Navarra, A Rioxa, Estremadura, Baleares, Canarias, Melilla e Murcia «solicitaron o progreso a Fase 3».
Despois das reunións, lembraron as mesmas fontes de Sanidad, abriuse «un proceso de análise e estudo da documentación técnica enviada» polas comunidades.
No caso concreto de Galicia, a Consellería de Sanidade remitiu o luns pola tarde a súa petición baseada en solicitar que todo o territorio galego avance a Fase 3 desde o luns 8 de xuño e en permitir a mobilidade entre as catro provincias ao estar nunha situación epidemiolóxica similar.
Está previsto que este venres o Goberno anuncie os respectivos cambios de fase no marco da desescalada con motivo da crise polo coronavirus COVID-19.
