Medio cento de persoas permanece en corentena tras cinco positivos por COVID-19 relacionados cun xornaleiro no municipio de Castro de Rei (Lugo), que levou a illar un edificio onde residen os traballadores con coronavirus.

Segundo informaron fontes da área sanitaria de Lugo a Europa Press, fixéronse medio centenar de PCR aos empregados que traballaban co caso inicial e aos que convivían con el.

No entanto, as mesmas fontes sinalaron que estes días «se van a facer probas a todos os traballadores da empresa, aínda que non traballasen na mesma explotación ou non convivisen con el».

Por parte da área sanitaria da provincia de Lugo puntualizaron que ese medio centenar de persoas que se atopa en corentena en Castro de Rei «son contactos dos positivos» detectados.

De feito, por parte do Sergas afirmaron que todos os contaxiados detectados en Castro de Rei «están illados, baixo control e en seguimento».

As persoas que deron positivo son xornaleiros que traballan na campaña da fresa nos municipios lucenses de Cospeito, Castro e Begonte, moitos deles de nacionalidade senegalesa.

O edificio onde se aloxan estas persoas con positivo en Castro Ribeiras de Lea «está en corentena», como confirmou o rexedor de Castro de Rei, o popular Francisco Balado, unha medida que «durará catorce días», abundou.