A compañía público-privada Recursos de Galicia (RDG) está a preparar un sistema de tarifas eléctricas «estables e competitivas» do parque eólico de Mondigo para empresas de diversos sectores que operan na Comunidade galega.
Co obxectivo de recoller os datos necesarios para deseñar un sistema adaptado ás necesidades dos sectores empresariais, este martes o conselleiro delegado de RDG, Emilio Bruquetas, mantivo encontros co tecido produtivo dos municipios lucenses de Trabada, Ribadeo e Barreiros, xunto cos seus alcaldes: Rubén García, Daniel Vega e Ana Belén Ermida, respectivamente.
A partir dos datos recollidos nas vindeiras semanas, por exemplo as necesidades e particularidades de cada sector empresarial, RDG deseñará un instrumento para que empresas de calquera punto de Galicia «melloren a súa competitividade nos custos enerxéticos».
A empresa público-privada impulsada pola Xunta para garantir que o aproveitamento dos recursos naturais da comunidade se traduza nun retorno económico e social para a cidadanía tenta desta forma que «as pemes conten coas vantaxes das grandes compañías na contratación de enerxía».
PRIMEIRO PARQUE EÓLICO
RDG comprou o parque eólico de Mondigo, que comezou a producir electricidade a finais do ano pasado, e que consta de 11 aeroxeradores, que totalizan 49,5 MW de potencia instalada. Está previsto que xere anualmente uns 131 GWh.
Este eólico facilita descontos directos na factura eléctrica para os veciños que residen nun radio de 1,8 quilómetros do parque situado na Mariña Oriental, a través do programa ‘Mondigo Beneficia’.
A Xunta de Galicia é o principal accionista de RDG, mentres que a parte privada está integrada actualmente por 32 empresas de toda clase, que sosteñen máis de 21.000 empregos directos e achegan anualmente un 14% do produto interior bruto da Comunidade galega.
