A longametraxe ‘O que arde’ foi nomeada a catro Premios Goya 2019, mentres que o intérprete lucense Luís Tosar competirá polo galardón de mellor actor protagonista por ‘Quien a hierro mata’.

En concreto, ‘O que arde’ está nomeada aos galardóns de mellor película, director (Oliver Laxe), actriz revelación (Benedicta Sánchez) e fotografía (Mauro Herce).

O pasado mes de maio, Oliver Laxe xa fixo historia ao converterse no primeiro cineasta español, xunto a Víctor Erice, en ser seleccionado en Cannes co seu tres primeiras obras e o único en ser premiado en todas as súas participacións.

No certame, ‘O que arde’ fíxose co Premio do Xurado da Sección Oficial ‘Un Certain Regard’ e o Premio á Mellor Creación Sonora da sección.

OUTROS NOMEAMENTOS GALEGOS

Pola súa banda ‘Quien a hierro mata’, película da produtora galega Vaca Films, conta con tres finalistas. Tosar como mellor actor, así como nas categorías de actor revelación (Enric Auquer) e mellor son.

Así mesmo, o actor vigués Santi Prego competirá a mellor actor revelación polo seu papel de Francisco Franco en ‘Mientras dure la guerra’, de Alejandro Amenabar.

Ademais, o lucense David Fidalgo Omil está nomeado a mellor curtametraxe de animación por ‘Homomaquia’, nunha denuncia aos malos tratos animais.

AS PELÍCULAS QUE OPTAN A MÁIS PREMIOS

‘Mientras dure la guerra’, de Alejandro Amenábar, é a película favorita da 34 edición dos Premios Goya cun total de 17 nomeamentos, seguida por ‘Dolor y gloria’, de Pedro Almodóvar, que conta con 16 candidaturas e ‘La trincheira infinita’, de Aitor Aguirre, Jon Garaño e Jose Mari Goneaga, con 15.

A entrega de premios da 34 edición dos Premios Goya terá lugar nunha gala que se celebrará o 25 de xaneiro en Málaga, e que contará de novo con Andreu Buenafuente e Silvia Abril como mestres de cerimonia.

Os actores Elena Anaya e Miguel Herrán foron os encargados de anunciar o nome dos aspirantes da edición de 2020 dos premios máis importantes do cinema español, nun acto no que estiveron acompañados polo presidente da Academia de Cinema, Mariano Barroso, e a notario Eva Sanz.