España vai suspender de maneira temporal a administración da vacina contra o coronavirus desenvolvida pola compañía AstraZeneca, após detectarse noutros países varios casos de trombose en persoas ás que se lle administraron esta vacina, segundo confirmaron a Europa Press.
Así se acordou no pleno do Consello Interterritorial do Sistema Nacional de Saúde (CISNS), convocado de maneira urxente este luns pola ministra de Sanidade, Carolina Darias, e no que participaron os conselleiros de Sanidade das comunidades autónomas.
Esta decisión xa foi adoptada por Francia, Alemaña, Iralia, Austria, Dinamarca, Estonia, Lituana, Noruega, Islandia, Tailandia e Irlanda. Ademais, comunidades autónomas como Cataluña, Castela e León, Canarias, Comunidade Valenciana, Asturias e Andalucía suspenderon preventivamente tamén a inoculación desta vacina.
Precisamente, o pasado sábado Galicia realizou unha vacinación masiva con Astrazeneca en 14 puntos diferentes con case 15.000 doses administradas entre persoas de 50 a 55 anos.
Actualmente, a Axencia Europea do Medicamento (EMA, polas súas siglas en inglés), que se vai volver reunir este martes, está a estudar os eventos trombóticos notificados, aínda que sinalou que, polo momento, non hai indicios de que a vacinación causase estas afeccións, «que non figuran como efectos secundarios desta vacina».
Do mesmo xeito, o pasado venres a Organización Mundial da Saúde (OMS) asegurou que «non hai razón para non usar» a vacina de AstraZeneca contra a COVID-19. «Hai persoas que morren todos os días, polo que é normal que haxa persoas que foron inmunizadas e morren. Os informes dispoñibles até agora non establecen unha relación directa cos trombos xa que esta porcentaxe observouse tamén entre a poboación xeral», dixo a subdirectora xeral da OMS para o Acceso a Medicamentos e Produtos Sanitarios, Mariângela Simão.
