Oito pacientes con coronavirus COVID-19 permanecen ingresados en hospitais de Galicia, en unidades de hospitalización convencional, mentres as UCIs seguen sen casos positivos.
Segundo a información facilitada polas áreas sanitarias galegas, na de Vigo dos 142 casos activos con COVID-19, tres corresponden a pacientes ingresados no Hospital Álvaro Cunqueiro e 139 en seguimento domiciliario. Até a data rexistrou 2.030 persoas curadas.
Na área Sanitaria da Coruña e Cee dos 109 casos de COVID activos, dous son pacientes hospitalizados no complexo hospitalario coruñés (Chuac).
Pola súa banda, na de Ourense os 26 casos activos corresponden a pacientes en seguimento no seu domicilio. Nesta provincia as persoas curadas ascenden a 1.854 e os falecidos sitúanse en 132.
A área de Pontevedra e O Salnés mantense igual que este luns sen pacientes con coronavirus hospitalizados e o oito casos activos que rexistra evolucionan nos seus domicilios.
Desde o inicio do plan de continxencia do COVID-19 curáronse 891 pacientes nesta área pontevedresa –sen cambios desde este luns– e faleceron 16 pacientes.
Na provincia de Lugo este martes os casos activos sitúanse en 19 –un menos que o luns–, con dous pacientes ingresados no HULA e 17 en seguimento domiciliario –un menos–. Até a data nesta área rexistráronse 28 falecementos e 917 persoas curadas.
O número de casos activos de coronavirus COVID-19 en Galicia aumentou nun con respecto a este luns e este martes sitúase en 349, mentres que os pacientes curados incrementáronse en dous até os 10.491.
